Viadi da finiziun dalla 3. superiura a Lucerna

La damaun dils 9 da zercladur essan nus semess sin via encunter Lucerna. Strusch arrivai el marcau, ha ei giu num da serender sin in “Foxtrail”. Tier quei giug havein nus giu da suandar ed empruar da pigliar in’uolp tenor indicaziuns. Aschia havein nus fatg ina biala tura atras il marcau da Lucerna e viu differents bials loghens. Grazia agl immens scharm ha ina gruppa schizun saviu far in viadi gratuit tochen sisum il “Sonnenberg”, il cuolm da casa da Lucerna cun ina bellezia survesta. La sera ein tuts i a dar heighels tochen tard ella notg.

L’autra damaun ha ei giu num da levar baul per ir a Brunnen sper il Lag dils Quatter Cantuns. Leu havein nus fatg duas gruppas per far ina biala tura sil lag cun canus gronds. Ord la perspectiva dils canus havein nus saviu admirar ina bellezia cuntrada. Nus essan canutai sper termenta greppa ora, fetg impressiunont. Da miezdi havein nus fatg in stop sil Rütli per barsar leu ina servela, in special mument. Silsuenter essan nus returnai a Brunnen per ir anavos a Lucerna. La sera essan nus stai en sortida el marcau ed havein gudiu la promenada spel lag.

La damaun dil tierz di ha ei giu num da pachetar e semetter sin via a casa. Sin viadi havein nus aunc fatg in stop ella farma da paintball a Dietwil. Staunchels e cuntents essan nus arrivai la sera a Laax e cun in tec cletg han tuts pudiu tier il bus per ir a casa. Nus vegnin a tener en buna memoria quei bi viadi da scola.